Bakıda vandalizm və hörmətsizliklə nəticələnən xoşagəlməz hadisə qeydə alınıb. İkinci Fəxri xiyabanda yerləşən məzar üzərindən tanınmış jurnalist və ictimai xadim Nəcəf Nəcəfovun xatirəsinə ucaldılan bürünc barelyef oğurlanıb.
Hadisəni törətməkdə şübhəli bilinən 1973-cü il təvəllüdlü Ü.Kazımov hüquq-mühafizə orqanlarının keçirdiyi tədbirlər nəticəsində qısa müddətdə müəyyən edilərək saxlanılıb. Araşdırmalar zamanı məlum olub ki, oğurlanan sənət əsəri artıq satıldığı yerdən tapılaraq maddi sübut kimi götürülüb və faktla bağlı cinayət işi başlanıb. Ölkə mətbuatında yayılan məlumatlara görə, hadisə ictimaiyyət tərəfindən böyük narazılıqla qarşılanıb.
Qeyd edək ki, oğurluğa hədəf olan bürünc barelyef başdaşının üzərində xüsusi olaraq quraşdırılmışdı və üzərində mərhumun redaktoru olduğu “Azərbaycan gəncləri” ilə “Azadlıq” qəzetlərinin səhifələri əks olunmuşdu. Xatırladılmalıdır ki, Nəcəf Nəcəfov ötən əsrin 80-90-cı illərində milli azadlıq hərəkatının tanınmış liderlərindən biri və mətbuat nümayəndəsi olub. O, ölkə jurnalistikasının inkişafındakı müstəsna xidmətlərinə görə 2004-cü ildə Prezident İlham Əliyevin sərəncamı ilə ölümündən sonra “Şöhrət” ordeni ilə təltif edilmişdi.