Rusiya rəsmiləri cari ildə ölkə ərazisinə qarşı həyata keçirilən ən miqyaslı hücum nəticəsində azı 7 nəfərin həlak olduğunu açıqlayıb.
Məlumata görə, hücum zamanı təxminən 822 pilotsuz uçuş aparatı (PUA) istifadə olunub ki, bunların da təxminən 600-ü birbaşa Moskvaya yönəlib. Paytaxtın yaxınlığındakı Koledino qəsəbəsində yerləşən və Rusiyanın "Amazon"u kimi tanınan "Wildberries" elektron ticarət platformasının anbarı hədəf alınıb. Baş verən güclü yanğın nəticəsində 3 nəfər yaralanıb. Ukrayna tərəfi bu zərbələrlə ölkədəki əsas logistika mərkəzlərinin əhəmiyyətli hissəsinin sıradan çıxarıldığını bildirir.
Bununla yanaşı, Rostov vilayətində gecə reydləri zamanı 5 nəfər həyatını itirib. Belqorodda mülki avtobusun vurulması nəticəsində bir qadın, Moskva vilayətində isə 83 yaşlı kişi ölüb.
Digər tərəfdən, Rusiyanın Ukrayna ərazisinə endirdiyi zərbələr də azı 7 nəfərin ölümünə və 39-dan çox insanın yaralanmasına yol açıb. Kiyevdə həyata keçirilən hücumlar zamanı hərbi təyinatlı obyektlərlə yanaşı, paytaxtın Poçayna rayonundakı kitab bazarı və vinil mağazası da dağıntılara məruz qalıb. Hadisə şahidlərinin BBC-yə verdiyi açıqlamada bazardakı kitabların külə döndüyü və nadir məhsulların məhv olduğu bildirilib.
Ukrayna Prezidenti Volodimir Zelenski son həftə ərzində ölkənin 13 bölgəsinin kütləvi hücumlara məruz qaldığını, minlərlə dron və idarə olunan bombanın atıldığını bəyan edib. 2022-ci ilin fevralından başlanan müharibənin hazırda əsasən hava məkanında dron və raket mübadiləsi şəklində davam etdiyi vurğulanır.