İşğaldan azad olunduqdan sonra sürətlə bərpa olunan və doğma sakinlərinə qucaq açan Laçın yeni bayram həyəcanı yaşayır. 26 Avqust – Laçın Şəhəri Günü münasibətilə şəhərdə genişmiqyaslı bayram proqramı təşkil olunacaq.
Beyanat.az xəbər verir ki, Mədəniyyət Nazirliyi və Azərbaycan Respublikası Prezidentinin Laçın rayonunda xüsusi nümayəndəliyinin birgə təşkilatçılığı ilə keçirilən tədbir dördüncü dəfədir ki, böyük coşqu ilə gerçəkləşdiriləcək.
Təntənəli mərasimdə rəsmi şəxslər, doğma ocaqlarına qayıdan laçınlılar, tanınmış mədəniyyət xadimləri və şəhərin çoxsaylı qonaqları iştirak edəcəklər.
Gün ərzində şəhərin müxtəlif guşələrində zəngin mədəni proqramlar təqdim olunacaq:
Sərgilər və tamaşalar: Laçının açıq səma altındakı məkanlarında tanınmış fırça sahiblərinin rəsm sərgiləri təşkil ediləcək, azyaşlı qonaqlar üçün xüsusi uşaq tamaşaları nümayiş olunacaq.
Möhtəşəm konsert: Bayram axşamı Azərbaycanın sevilən incəsənət ustaları və bədii kollektivlərinin iştirakı ilə böyük konsert proqramı baş tutacaq. Səhnədə milli musiqimizin və rəqs ənənələrimizin ən parlaq nümunələri nümayiş etdiriləcək.