ABŞ və İsrailin fevralın sonundan etibarən başladığı hərbi qarşıdurma qlobal miqyasda tarazlığı pozmaqda davam edir. Reuters agentliyinin yaydığı məlumata görə, tərəflər arasında sülh danışıqları dalana dirənib və mövqelər getdikcə daha da sərtləşir.
Hörmüz boğazı blokadada: Gəmiçilik demək olar ki, dayanıb
Strateji cəhətdən dünyanın ən vacib neft marşrutlarından biri olan Hörmüz boğazında vəziyyət gərgin olaraq qalır. İran rəsmiləri Vaşinqtona məğlubiyyəti qəbul etməyi çağıraraq, boğazın yalnız Tehranın nəzarəti altında açılıb-bağlana biləcəyini və blokadanın qətiyyətlə davam etdiriləcəyini bəyan ediblər.
Müharibə səbəbindən bu su yolundan neft tankerlərinin hərəkəti demək olar ki, dayanıb. Əvvəllər gündəlik 130-dan çox gəminin keçdiyi boğazdan son günlər cəmi iki gəmi keçib və xam neft daşınması qeydiyyata alınmayıb. İcazəsiz keçməyə cəhd edən gəmilər isə raket və dron təhlükəsi ilə üzləşir; son günlərdə BƏƏ-yə məxsus gəmilərin və ticarət gəmilərinin hücuma məruz qalması narahatlıqları daha da artırıb.
Tramp: "Bir qədər baha benzin ödənişə dəyər"
ABŞ Prezidenti Donald Tramp Nyu-Yorkda keçirilən tədbirdə amerikalıları münaqişə fonunda yüksələn yanacaq qiymətləri ilə barışmağa çağırıb. O qeyd edib ki, "çox şər bir ölkənin" nüvə silahına sahib olmasının qarşısını almaq üçün bir qədər baha benzin pulu ödəmək tamamilə məntiqli xərchdir.
Məlumat üçün bildirək ki, ABŞ-də bir qallon benzinin orta qiyməti ötən illə müqayisədə 29% artaraq 4,08 dollara çatıb. Bu isə seçicilər arasında narazılıq yaratsa da, Ağ Ev administrasiyası İrana qarşı maliyyə təzyiqlərini daha da gücləndirməkdə qərarlıdır. ABŞ Maliyyə Nazirliyi yaxın günlərdə Tehran əleyhinə yeni sanksiya və tədbirlərin elan olunacağını bildirib.
İranda iqtisadi böhran və regional təhlükələr
Hər nə qədər İran rəsmiləri sərt bəyanatlar səsləndirsələr də, ölkə iqtisadiyyatı müharibənin və sanksiyaların ağır yükünü hiss edir. Prezident Məsud Pezeşkiyan ölkədəki yüksək inflyasiyanı ABŞ-nin liman blokadası və neft ixracına tətbiq etdiyi məhdudiyyətlərlə əlaqələndirib.
Bununla yanaşı, münaqişənin əhatə dairəsi genişlənməkdə davam edir. Yəməndə husilərin Qırmızı dənizdəki hədəflərə və Səudiyyə Ərəbistanındakı Aramco obyektlərinə raket və dron hücumları təşkil etməsi regionda sabitliyin bərpasını daha da uzaqlaşdırır.