Layihənin əsas hədəfləri
Genişmiqyaslı tədbirlərin əsas məqsədi qırmızı və yaşıl xətlər arasındakı qarşılıqlı asılılığa son qoymaq, stansiyalardakı sıxlığı əhəmiyyətli dərəcədə azaltmaq, qatarlararası gözləmə intervallarını minimuma endirmək və hərəkətin dayanıqlılığını təmin etməkdir. Bu çərçivədə “Dərnəgül” elektrik deposunun tikintisinin ikinci mərhələsi yekunlaşmaq üzrədir və “Cəfər Cabbarlı” – “Nizami” sahəsini birləşdirəcək 200 metrlik yeni tunellərin inşasına start verilir.
Bundan əlavə, “28 May” və “Cəfər Cabbarlı” stansiyalarını əlaqələndirən və tikintisi son mərhələdə olan ikinci sərnişin pilləkəni stansiyalar arasındakı keçidləri daha rahat və sürətli edəcək. Bütün bu işlər başa çatdıqdan sonra “İçərişəhər” istiqamətinə gedən sərnişinlər “28 May”, “Dərnəgül” istiqamətinə hərəkət edənlər isə “Cəfər Cabbarlı” stansiyasının platformasından istifadə edəcəklər. Eyni zamanda, “İçərişəhər” dönmə kamerasının tikintisinin 2028-ci ilin ikinci yarısında tamamlanması nəzərdə tutulur ki, bu da hər iki xətt üzrə intervalların 2 dəqiqəyədək endirilməsinə imkan verəcək.
Təmir dövründə metronun iş rejimi
Yaranan məhdudiyyətlərlə əlaqədar xətlər üzrə qatarların hərəkət cədvəli aşağıdakı kimi tənzimlənib:
“Qırmızı” xətt: “İçərişəhər” stansiyasında gücləndirilmiş rejim tətbiq olunmaqla qatarlar “İçərişəhər” – “Əhmədli” marşrutu üzrə 2 dəqiqə 30 saniyəlik intervalla hərəkət edəcək (“Əhmədli” – “Həzi Aslanov” mənzilində təmir bitənə qədər həmin hissədəki mövcud məkik intervalı saxlanılacaq).
“Yaşıl” xətt: Qatarlar “Dərnəgül” – “Nizami” marşrutu üzrə 3 dəqiqə 30 saniyəlik intervalla işləyəcək.
“Cəfər Cabbarlı” – “Xətai” mənzili: Məkik hərəkət rejimi dəyişməz qalaraq 7 dəqiqəlik intervalda fəaliyyətini davam etdirəcək.
“Bənövşəyi” xətt: “Xocəsən” – “8 Noyabr” marşrutu üzrə 8 dəqiqəlik interval qüvvəsində qalır.
Alternativ nəqliyyat və yeni ekspres xətlər
Stansiyalar arasında birbaşa metro əlaqəsinin olmaması səbəbindən sərnişinlərin rahatlığını təmin etmək üçün Azərbaycan Yerüstü Nəqliyyat Agentliyi (AYNA) tərəfindən əlavə tədbirlər görülüb. Səhər saat 06:00-dan gecə 00:00-dək fəaliyyət göstərəcək ödənişli əsaslı yeni ekspres avtobus xətləri istifadəyə verilib:
M1: “Elmlər Akademiyası” və “28 May” stansiyaları arasında
M2: “İnşaatçılar”, “Nizami” və “28 May” stansiyaları arasında
M3: “20 Yanvar”, “Nizami” və “28 May” stansiyaları arasında
M4: “20 Yanvar” və “Koroğlu” stansiyaları arasında
M5: “20 Yanvar” və “Gənclik” stansiyaları arasında
M6: “Elmlər Akademiyası” və “Gənclik” stansiyaları arasında
Bunlarla yanaşı, sərnişin axınını tənzimləmək məqsədilə 2, 6, 7A, 9, 10, 14, 17, 18, 26, 61, 65, 79, 85, 88, 88A, 93, 133, 165, 199 və 202 nömrəli mövcud müntəzəm marşrut xətlərində də avtobusların sayı artırılaraq intervallar azaldılıb.