Azərbaycanda avqustun 20-si gündüzdən başlayaraq hava şəraitinin qeyri-sabit keçəcəyi, şimal və qərb rayonlarından başlayaraq fasilələrlə yağıntılı olacağı gözlənilir. Milli Hidrometeorologiya Xidmətinin məlumatına əsasən, ayrı-ayrı yerlərdə yağışların qısamüddətli leysan xarakterli intensiv olacağı, şimşək çaxacağı və dolu düşəcəyi ehtimal edilir. Gözlənilən yağıntılarla əlaqədar olaraq çaylarda sululuğun artacağı, bəzi dağ çaylarından isə qısamüddətli sel keçməsi istisna olunmur.
Bakı və Abşeron yarımadasında hava şəraiti
Paytaxtda və Abşeron yarımadasında hava şəraitinin əsasən yağmursuz keçəcəyi proqnozlaşdırılır. Lakin avqustun 20-si gündüzdən 21-i gündüzədək şimal-qərb küləyinin güclənəcəyi gözlənilir. Bu dövrdə havanın temperaturu 29–33 dərəcə isti təşkil edəcək. Həftə sonlarında – avqustun 22-23-də isə mülayim cənub-şərq küləyi üstünlük təşkil edəcək və havanın maksimal temperaturunun 30–35 dərəcəyə çatacağı gözlənilir.
Regionlarda gözlənilən hava və temperatur
Şimal və qərb rayonlarında avqustun 20-si gündüzdən 21-i gündüzədək havanın qeyri-sabit keçəcəyi, leysan və dolu ehtimalının olduğu bildirilir. Avqustun 22-23-də isə ölkə ərazisində əsasən yağmursuz hava şəraiti müşahidə olunacaq. Bu günlərdə havanın maksimal temperaturu aran rayonlarında 33–38 dərəcə, dağlıq ərazilərdə isə 20–25 dərəcə isti təşkil edəcək.
Güclü küləklə bağlı "sarı" xəbərdarlıq
Milli Hidrometeorologiya Xidməti gözlənilən küləkli hava şəraiti ilə əlaqədar olaraq bir sıra bölgələrə sarı xəbərdarlıq verib. Xəbərdarlığa əsasən, Bakı və Abşeron yarımadası ilə yanaşı, Naxçıvan MR, Gəncə, Mingəçevir, Şirvan, Cəbrayıl, Naftalan, Füzuli, Qazax, Ağstafa, Şəmkir, Samux, Tovuz, Daşkəsən, Gədəbəy, Cəlilabad, Biləsuvar, Goranboy, Göygöl, Beyləqan, Salyan, Qobustan, Sabirabad, Neftçala, Hacıqabul, Xaçmaz, Siyəzən, Şabran, Quba, Xızı və Qusarda şimal-qərb küləyi əsəcək. Küləyin sürətinin 13.9–20.7 m/san arasında olacağı gözlənilir.
Avqust ayının hava statistikası
Xidmətin təqdim etdiyi məlumata görə, cari ayın 19-na qədər olan dövrdə ölkə ərazisində havanın temperaturu əsasən normadan yüksək olub. Belə ki, 17 gün ərzində temperatur normadan 0.4–5.2 dərəcə yuxarı qeydə alınıb, yalnız 1 gün normadan 0.3 dərəcə aşağı olub. Ayın 9-da isə temperatur normadan 5.2 dərəcə yüksələrək 38.6 dərəcə isti təşkil edib.