Hər müəllimin öz süni intellekt köməkçisi ola bilər. Dövlət İmtahan Mərkəzinin (DİM) sədri Məleykə Abbaszadə təhsil işçilərinin sentyabr konfransında çıxışı zamanı məhz bu təşəbbüslə çıxış edib. O bildirib ki, pedaqoqların işini asanlaşdırmaq üçün xüsusi platforma yaradıla və hər bir müəllim özünəməxsus süni intellekt (Aİ) assistentinə sahib ola bilər.
Çıxışı zamanı illər əvvəl yaşadığı maraqlı bir xatirəni bölüşən DİM sədri həmin çətinlikləri belə xatırladıb: “1988-ci ildə mən ilk dəfə mühazirə oxuyanda səhər saat 6-da anamı yuxudan oyadırdım, informatikadan mühazirəni ona oxuyurdum. Çünki onda mənim üçün Azərbaycan dilində professional terminləri demək çətin idi. O mənim faktiki olaraq assistentim idi”.
İndi isə texnologiyanın inkişafı sayəsində bu cür problemlərin tarixdə qaldığını vurğulayan Məleykə Abbaszadə müəllimlərin müvafiq təlimlərə cəlb edilməklə rəqəmsal alətlərdən maksimum səviyyədə yararlanmasının vacibliyini diqqətə çatdırıb.